تكلفة تصميم الهوية البصرية في السعودية

ليش أسعار الهوية البصرية تختلف كذا؟

لأن كلمة "هوية" تعني أشياء مختلفة عند كل جهة. واحد يقصد شعار وكم لون في ملف PDF. وواحد يقصد بحث سوق، واستراتيجية، واسم، وشعار، ودليل، وتطبيق الهوية على كل شي من الكوب لين اللوحة. الاثنين يسمونها "هوية بصرية"، والفرق بينهم مثل الفرق بين شقة على العظم وشقة مفروشة.

عشان كذا مقارنة الأسعار بدون مقارنة النطاق ما تفيدك. أول سؤال لازم تسأله لأي عرض: وش بالضبط بستلم؟

العوامل اللي تحدد تكلفة الهوية البصرية

الاستراتيجية قبل التصميم

لو مشروعك جديد وما عندك وضوح في جمهورك وموقعك في السوق، فيه شغل قبل التصميم: جلسات، نظرة على المنافسين، صياغة شخصية العلامة. هذا يضيف للتكلفة، بس يوفر عليك تصميم هوية على أساس غلط. ولو عندك هذا الوضوح أصلًا تقدر تتخطاه. تفاصيل أكثر في صفحة استراتيجية العلامة التجارية.

الاسم

لو لسه ما اخترت اسم، أو اسمك الحالي مستخدم عند غيرك، فالتسمية مرحلة لحالها: توليد أسماء، فحص مبدئي، وتجربة النطق بالعربي والإنجليزي.

عدد اللغات

هوية بلغة وحدة أبسط من هوية عربية وإنجليزية. والهوية اللي تتصمم باللغتين مع بعض من البداية تاخذ جهد أكثر من اللي تتصمم بالإنجليزي ويتركب لها عربي جاهز، بس النتيجة ما تتقارن.

نوع الشعار

شعار نصي مرتب غير شعار فيه رمز مرسوم، وغير شعار بخط عربي يدوي من الصفر. كل ما زادت الحرفة اليدوية زاد الوقت.

عدد التطبيقات

هذا غالبًا أكبر عامل. كرت عمل وورق رسمي شي، ومنيو وأكياس وأكواب ولوحات وزي موظفين وقوالب سوشال شي ثاني تمامًا. كل تطبيق يحتاج تصميم وتجهيز ملف للطباعة أو للشاشة.

الرسومات والشخصيات

بعض العلامات تحتاج شخصية (ماسكوت) أو مكتبة رسومات أو أنماط خاصة. هذي إضافات تعطي الهوية روح، بس لها وقتها وجهدها.

حجم الدليل

دليل مختصر لفريق صغير غير دليل مفصل لشركة فيها فروع ووكالات تشتغل معها.

سرعة القرار عندك

هذا العامل محد يقوله لك. المشروع اللي فيه صاحب قرار واحد وواضح يخلص أسرع وبجولات أقل. المشروع اللي فيه شركاء كثير، كل واحد يشوف الشغل في وقت مختلف، ياخذ أطول وأحيانًا يكلف أكثر.

وش المفروض ما يأثر على التكلفة؟

حجم شركتك بحد ذاته. فيه جهات تسعر حسب شكل العميل: لو شافتك شركة كبيرة رفعت. المنطقي إن السعر يمشي على النطاق والجهد. شركة كبيرة تبي شعار وكرت بس، المفروض تدفع على شعار وكرت.

كيف تقارن بين عروض أسعار الهوية؟

حط العروض جنب بعض واسأل نفس الأسئلة لكل واحد:

• كم اتجاه مبدئي بشوف، وكم جولة تعديل؟
• هل الشعار باللغتين؟ ومين يصمم العربي؟
• وش التطبيقات المشمولة بالاسم؟
• هل فيه دليل استخدام؟ وكم تفصيله؟
• هل أستلم الملفات المصدرية المفتوحة؟ ومين يملكها؟
• هل فيه عقد رسمي وفاتورة؟
• وش يصير لو احتجت شي بعد التسليم؟

العرض الأرخص اللي ما يعطيك ملفات مفتوحة أو ما فيه عقد، ممكن يطلع أغلى بعد سنة لما تحتاج تعيد الشغل من أوله.

متى يكون الأرخص هو الصح؟

بصراحة، أحيانًا. لو مشروعك فكرة تبي تختبرها، أو متجر صغير بتجربه في موسم رمضان وتشوف، ما تحتاج هوية كاملة. خذ شعار نظيف ولونين وخط، وابدأ. لما تتأكد إن المشروع ماشي، استثمر في هوية حقيقية.

الغلط إنك تصرف ميزانية كبيرة على هوية قبل ما تعرف إذا فيه سوق أصلًا. والغلط المعاكس إنك تكبر وتفتح فروع وأنت لسه بشعار مسوي على عجلة.

كيف تخلي ميزانيتك تروح للمكان الصح؟

• ابدأ بالتطبيقات اللي بتستخدمها فعلًا في أول مرحلة. اللوحات والزي ممكن تجي بعدين.
• اجمع أصحاب القرار من أول اجتماع.
• جهز معلوماتك قبل: نشاطك، جمهورك، منافسينك، وأمثلة تعجبك.
• لو عندك هوية قديمة فيها شي يستاهل، قول. أحيانًا التطوير أوفر من البداية من الصفر.
• لو تقدر، خل الهوية والموقع مع نفس الجهة، عشان ما تدفع مرتين على فهم مشروعك.

كيف نحدد التكلفة في استوديو محي حسن؟

نسمع عن مشروعك، ونحدد معك وش تحتاج الحين ووش ممكن يتأجل، وبعدها نرسل لك عرض مفصل فيه المخرجات بالاسم. لما توافق نوقع عقد رسمي وتستلم فاتورة. التسليم سريع، والدعم مستمر بعد التسليم، والملفات المصدرية كلها لك.

صفحات تهمك

• تصميم الهوية البصرية في السعودية
• تصميم شعار في السعودية
• تكلفة تصميم المواقع
• كيف تختار شركة هوية بصرية
• دليل الهوية البصرية
• هوية الشركات الناشئة

من شكل العلامة إلى استخدامها اليومي

الهوية تظهر قيمتها عندما تعمل على أكثر من مقاس وخامة. الأمثلة التالية توضح كيف نربط بين العلامة وتطبيقاتها، من حقيبة التوصيل إلى شخصية المنتج والمطبوعات.

شاهد دراسات حالة من مجالات أخرى