تموضع العلامة التجارية في السعودية
لو عميلك يقول لصاحبه "كلهم نفس الشي"، فأنت تنافس على السعر بس. التموضع هو اللي يخليه يقول اسمك أنت.
تموضع العلامة التجارية هو المكان الذي تشغله العلامة في ذهن العميل مقارنة بالبدائل المتاحة له، ويُعبَّر عنه بجملة داخلية تحدد الجمهور والميزة والدليل عليها. في استوديو محي حسن يُختبر التموضع بقاعدة بسيطة: إذا بقيت الجملة صحيحة بعد وضع اسم منافس مكان اسم العلامة، فهي ليست تموضعًا وتُعاد صياغتها.
وش يعني تموضع العلامة التجارية؟
التموضع هو المكان اللي تحتله علامتك في راس العميل مقارنة بغيرك. مو اللي تقوله أنت عن نفسك، اللي يقوله العميل لصاحبه لما يسأله "وين أروح؟". لو جوابه "روح لفلان، أسرع واحد"، فهذا تموضع. لو قال "كلهم نفس الشي"، فأنت ما عندك تموضع، عندك محل.
الفكرة بسيطة لكن تطبيقها صعب، لأنها تتطلب منك تختار. والاختيار يعني إنك تتنازل عن شي.
كيف تعرف إن علامتك ما لها تموضع واضح؟
فيه علامات تتكرر عندنا مع العملاء:
- تنافس على السعر بس، وكل ما نزّل منافس نزلت معه
- الموقع والانستقرام يقولون كلام عام مثل "جودة عالية وخدمة ممتازة"
- كل موظف يشرح المشروع بطريقة مختلفة
- العملاء يجون مرة وما يرجعون، وما يقدرون يقولون ليش اختاروك أصلا
كيف نبني التموضع؟
نبدأ من ثلاث أسئلة ونرجع لها كل شوي: مين بالضبط العميل اللي نبيه؟ وش البديل اللي يستخدمه اليوم؟ وش الشي اللي نقدمه وصعب على غيرنا يقدمه بنفس الطريقة؟
بعدها نكتب جملة تموضع داخلية. هذي الجملة ما تنحط على الإعلان، هي للفريق. شكلها تقريبا كذا: "لـ[جمهور محدد] اللي [عندهم مشكلة محددة]، [اسم العلامة] هي [التصنيف] اللي [الميزة]، لأن [السبب اللي يخلي الكلام قابل للتصديق]". الجزء الأخير هو اللي ينساه الأغلب. ميزة بدون دليل مجرد شعار.
وبعدين نختبر الجملة: لو حطيت اسم منافسك بدال اسمك وظلت الجملة صحيحة، فهي مو تموضع. نرجع ونشتغل عليها لين تصير لك أنت بس.
وش الفرق بين التموضع والاستراتيجية والهوية؟
الاستراتيجية أوسع، تشمل الجمهور والقيم والنبرة والأهداف. التموضع جزء منها، وهو الجزء الأحد: النقطة اللي تفرقك. والهوية البصرية هي اللي توصل هذا التموضع للعين قبل ما يقرأ العميل أي كلمة. علامة تموضعها "فاخر وهادي" ما ينفع ألوانها صارخة وخطوطها مزدحمة، حتى لو الكلام مكتوب صح.
التموضع في السوق السعودي تحديدا
فيه قطاعات في السعودية صارت مزدحمة جدا: القهوة، العطور، العبايات، متاجر الإلكترونيات على سلة وزد، تطبيقات التوصيل. في هذي القطاعات العميل يشوف عشرات الخيارات في يوم واحد. اللي ينجح عادة مو الأكبر، اللي يعرف بالضبط لمين هو.
وفيه نقطة ثانية: علامات سعودية كثير تحاول تبين إنها "عالمية" عشان تبان أرقى، فتطلع باردة وما فيها أي شي محلي. وفي المقابل علامات تحط كل رموز التراث في كل مكان لين يصير الشكل مستهلك. التموضع الذكي يعرف وش ياخذ من المحلي وكم.
أخطاء نحذرك منها
لا تتموضع على شي يقدر منافسك ينسخه بكرة، مثل "توصيل مجاني". ولا تتموضع على صفة عامة مثل "الجودة"، لأن محد بيقول عن نفسه إنه رديء. ولا تغير تموضعك كل موسم. التموضع يحتاج وقت عشان يثبت في راس الناس، وكل ما غيرته رجعت للصفر.
وش يأثر على حجم الشغل؟
هل عندك دراسة سوق جاهزة ولا نبدأ من الصفر، كم منتج أو خدمة تحت العلامة، وهل التموضع لسوق واحد ولا أكثر. مشروع واحد بسوق واضح يمشي أسرع بكثير من مجموعة تبي تتموضع في أكثر من دولة.
صفحات تهمك
- استراتيجية العلامة التجارية
- دراسة السوق والجمهور
- تسمية العلامة التجارية
- إعادة بناء الهوية
- هوية الشركات الناشئة والمنصات
قرارات التصميم لازم تظهر في التطبيق
نبدأ بفهم الجمهور وطريقة تقديم الخدمة، ثم نختبر كيف تتحول القرارات إلى صورة ورسالة وتكوين. هذه التطبيقات توضح تنوع الأنظمة البصرية؛ ويتحدد نطاق البحث والاستراتيجية لكل مشروع قبل البدء.
وسط علامات متشابهة، التموضع الواضح هو اللي يخلي علامة وحدة تبان من أول نظرة.
مقارنة صريحة
استوديو، فريلانسر، ولا وكالة كبيرة؟
مثال من شغلنا
كيف ميّزنا Wesell بين منصات البيع
Wesell منصة إماراتية تسهل البيع على الناس وتربط البائع بالجمهور المناسب له. التحدي كان واضح: سوق منصات الـSaaS مزدحم، والمنصات تشبه بعض في الشكل والكلام.
الهدف كان هوية توصل فكرة السهولة والفعالية، وتخلي المستخدم يتذكر Wesell كأول خيار لما يبي يبيع. اشتغلنا على الهوية البصرية ودليل الاستخدام على هذا الأساس. شوف مشروع Wesell
وش تستلم مع تموضع العلامة
- جملة تموضع داخلية بالعربي والإنجليزي
- تحديد الجمهور الأساسي والبديل اللي يستخدمه اليوم
- الميزة الأساسية والأدلة اللي تدعمها
- خريطة موقعك بين المنافسين
- رسائل أساسية مشتقة من التموضع للموقع والسوشال والمبيعات
- ملاحظات تربط التموضع بالهوية البصرية والنبرة
أظهر محي شغفًا والتزامًا كبيرين بالمشروع من البداية، وسلّم حلولًا عالية الجودة في وقتها. اهتمامه بالتفاصيل كان لافتًا، وأنصح به بشدة.
كيف نعمل
1. نفهم البدائل
مو بس منافسينك المباشرين. أي شي ممكن العميل يختاره بدالك.
2. نحدد المساحة
نرسم المنافسين على خريطة ونشوف وين فيه زحمة ووين فيه فراغ يناسبك.
3. نكتب ونختبر
نكتب أكثر من صيغة للتموضع، ونختبر كل وحدة بقاعدة اسم المنافس، ونستبعد اللي ما تصمد.
4. نعتمد ونترجم للتطبيق
بعد الاعتماد نطلع منها الرسائل والملاحظات اللي يحتاجها فريق التصميم والمحتوى.
لماذا استوديو محي حسن
- نختبر التموضع قبل ما نعتمده، ما نكتفي بجملة حلوة
- محي حسن يشتغل على التموضع بنفسه مع صاحب القرار
- تسليم سريع، والمراحل واضحة من البداية
- دعم بعد التسليم لما تبدأ تطبق الرسائل على أرض الواقع
- عقد رسمي وفاتورة، وكل الملفات ملكك
- نفس الفريق يترجم التموضع لهوية وموقع، فما يضيع في النص
أسئلة شائعة
وش الفرق بين التموضع والشعار الإعلاني؟
التموضع قرار داخلي عن مكانك في السوق، والشعار الإعلاني جملة قصيرة للجمهور تطلع منه. ممكن تغير الشعار الإعلاني، بس التموضع يثبت.
كيف أعرف إن تموضعي ضعيف؟
إذا كنت تنافس على السعر بس، أو إذا كلامك عن نفسك ينطبق على منافسك. هذي أوضح علامتين.
هل أقدر أغير تموضعي بدون ما أغير الهوية؟
أحيانا إيه، لو الهوية الحالية مرنة. لكن لو التموضع الجديد بعيد عن الشكل الحالي، بتحتاج تعديل في الهوية عشان الكلام والشكل يمشون مع بعض.
كم ياخذ تحديد التموضع؟
يعتمد على عدد المنتجات والأسواق وهل فيه دراسة سابقة. نحدد الجدول معك من البداية، وتسليمنا سريع.
وش أحتاج أجهز؟
أسماء منافسينك، وليش تحس العملاء يختارونك أو ما يختارونك. وأي تقييمات أو ملاحظات من العملاء تفيدنا كثير.
كل خدماتنا
كل اللي نقدر نسويه لمشروعك
عملاءك يقولون "كلهم نفس الشي"؟
أرسل لنا على واتساب اسم مشروعك وثلاث منافسين، ونقولك وين نشوف المساحة اللي تقدر تاخذها.