تصميم لوحات وواجهات المحلات في السعودية

اللوحة مو الشعار مكبّر

أكثر شي نشوفه إن صاحب المحل يعطي ملف الشعار لمصنع اللوحات ويقول كبروه. النتيجة لوحة فيها تفاصيل رفيعة ما تبان من الشارع، ونص إنجليزي مزحوم تحت العربي، وإضاءة تخلي نص الحروف تضيع بالليل. اللوحة لها منطق مختلف: المسافة، السرعة، الزاوية، والضوء.

المحل اللي على شارع رئيسي ينشاف من سيارة ماشية، يعني عندك ثواني. والمحل اللي داخل مول ينشاف من ممر ضيق ومن جنب. نفس الشعار، لوحتين مختلفة تمامًا.

كيف تصمم لوحة محل تنقرأ من بعيد؟

أول شي نسأله: من وين يشوفك العميل؟ نطلب صور للواجهة من الشارع، ومن الرصيف المقابل، ولو أمكن بالليل. بعدين نقرر وش اللي لازم ينقرأ أول: الاسم، ولا النشاط، ولا الشعار الرمزي. غالبًا ما تقدر تبرز الثلاثة بنفس القوة، والمحاولة تخلي اللوحة ما تبرز شي.

نصيحتي: لو اسمك ما يشرح نشاطك، حط النشاط بكلمة وحدة واضحة جنب الاسم (مخبز، صيدلية، قهوة). الناس ما راح يوقفون يخمنون.

العربي والإنجليزي على اللوحة

أغلب اللوحات في السعودية تحتاج اللغتين، والتحدي إن الاثنين يتوازنون. لو العربي مصمم مع الإنجليزي من أول يوم في الهوية، الموضوع سهل. لو لا، نضبط الأحجام والمسافات بينهم عشان ما يصير واحد منهم هامش صغير ما ينقرأ. وننتبه لاشتراطات البلدية في مدينتك، لأنها أحيانًا تحدد أشياء مثل مكان اللوحة ومساحتها ونسبة اللغات، والأفضل تتأكد منها مع المصنع أو المكتب الهندسي قبل التنفيذ.

الإضاءة والخامات

حروف بارزة مضيئة من الأمام، إضاءة خلفية تعطي هالة حول الحروف، لوحة صندوقية مضيئة، أو حروف معدنية بدون إضاءة مع كشاف. كل وحدة تغير شكل الشعار. الخط العربي الرفيع مثلًا ما ينفع مع حروف بارزة صغيرة، لأن الليد ما يدخل. فنقترح لك النوع اللي يناسب شعارك، ولو احتاج نسوي نسخة من الشعار مخصوص للوحة.

وشي مهم: ارفض أي تنفيذ قبل ما تشوف بروفة أو عينة حرف باللون والإضاءة الحقيقية. اللون على الشاشة غير اللون في الأكريلك المضيء.

مو بس اللوحة الرئيسية

الواجهة الكاملة فيها أشياء كثير أحد ينساها: اللوحة الجانبية المعلقة اللي تنشاف من الرصيف، ملصقات الزجاج، لوحة أوقات العمل، اللوحات الإرشادية داخل المحل، ولوحة المنيو لو كان مطعم. لو تصممت مع بعض، المحل يبان مرتب من برا ومن جوا.

وش تجهز قبل لا تكلمنا؟

صور للواجهة من أكثر من زاوية، مقاسات المساحة المتاحة للوحة، الهوية أو الشعار بملف مفتوح، واسم مصنع اللوحات لو اخترته. ولو ما عندك هوية أصلًا، لا تبدأ باللوحة. ابدأ بالهوية، واللوحة تطلع منها.

صفحات تهمك

• تصميم المطبوعات
• تصميم الهوية البصرية
• هوية المطاعم والكافيهات
• هوية العيادات والصيدليات
• تصميم شعار بالخط العربي
• تصميم منيو مطعم وكافيه

هوية صيدلية د. عماد محيي الدين

تظهر الهوية على الواجهة وحقيبة التوصيل وملف الوصفة. الرمز واللون البنفسجي يربطان بين هذه الاستخدامات مع الحفاظ على وضوح الاسم العربي.

شاهد دراسات حالة من مجالات أخرى