وش يحتوي دليل الهوية البصرية؟

وش هو دليل الهوية البصرية؟

دليل الهوية هو كتيب التشغيل حق علامتك. أي أحد يصمم لك شي بعد اليوم، موظف تسويق، مطبعة، مطور موقع، مصمم مستقل تشغله لحملة رمضان، يفتح الدليل ويعرف بالضبط وش المسموح ووش الممنوع.

بدون دليل، الهوية تبدأ تتآكل من أول شهر. لون مختلف شوي في البوست، خط ثاني في المنيو، شعار ممطوط على اللوحة. كل واحدة لحالها بسيطة، بس بعد سنة تلقى علامتك صارت خمس علامات.

الأقسام الأساسية في دليل الهوية

1. مقدمة عن العلامة

صفحة أو صفحتين عن مين أنتم، ومين تخاطبون، ووش الشخصية اللي تبين الناس تحسها. هذي تساعد أي مصمم جديد يفهم الروح قبل القواعد.

2. الشعار

كل نسخ الشعار (الأساسي، الأفقي، العمودي، الرمز)، ومتى تستخدم كل وحدة. المسافة الفاضية حول الشعار، وأصغر حجم ينفع ينطبع أو ينعرض فيه، والنسخ الأحادية للخلفيات الفاتحة والداكنة.

3. الألوان

اللون الرئيسي والألوان المساندة، بأكواد الطباعة والشاشات. والأهم من الأكواد: النسب. وش اللون اللي يسيطر، ووش اللي يجي لمسات بس. هذا اللي يخلي الهوية تنعرف من بعيد.

4. الخطوط

الخط العربي والإنجليزي، والأوزان المستخدمة، وأحجام العناوين والنصوص، وكيف تتركب اللغتين في نفس التصميم. هذا القسم بالذات يطيح فيه كثير من الأدلة عندنا، لأنها تشرح الإنجليزي بالتفصيل وتنسى العربي.

5. العناصر الجرافيكية

الأنماط والأشكال والأيقونات، ولو عندك شخصية للعلامة تشرح وضعياتها وتعابيرها ومتى تظهر.

6. أسلوب الصور والرسومات

وش نوع الصور اللي تشبه علامتك؟ إضاءة، زوايا، ألوان، ناس ولا منتجات. أمثلة مقبولة وأمثلة مرفوضة جنب بعض.

7. نبرة الكلام

مو كل الأدلة فيها هذا القسم، بس ننصح فيه. هل علامتك تتكلم بلهجة أو فصحى؟ رسمية أو ودية؟ وش الكلمات اللي ما تستخدمها أبدًا؟

8. التطبيقات

أمثلة جاهزة: بطاقة عمل، أوراق رسمية، قوالب سوشيال، تغليف، لوحة، زي موظفين، شاشات تطبيق. كل مشروع حسب نشاطه. مطعم يحتاج منيو وأكواب، ومتجر يحتاج كرتون وملصقات.

9. الممنوعات

القسم اللي الناس تستهين فيه وهو من أهم الأقسام: لا تمط الشعار، لا تغير ألوانه، لا تحطه على خلفية مزحومة، لا تضيف ظلال. أمثلة مرسومة للغلط أوضح من أي شرح.

دليل مختصر ولا دليل كامل؟

ما كل مشروع يحتاج مرجع من مية صفحة. مشروع صغير بفريق محدود يكفيه دليل مختصر فيه الشعار والألوان والخطوط والممنوعات. أما شركة عندها فروع أو فريق تسويق أو تتعامل مع أكثر من مورد، فالدليل الكامل يوفر عليها كثير من المراجعات والتصحيح.

نصيحتنا: ابدأ بالمختصر لو مشروعك جديد، بس خله مبني بطريقة تقدر تضيف عليه بعدين.

قائمة تتأكد فيها إن دليلك كامل

• هل فيه نسخ الشعار بالعربي والإنجليزي؟
• هل الألوان مكتوبة بأكواد الطباعة والشاشات مع بعض؟
• هل الخط العربي محدد بالاسم والأوزان؟
• هل فيه أصغر حجم للشعار؟
• هل فيه أمثلة للاستخدام الغلط؟
• هل فيه تطبيقات تشبه نشاطك فعلًا؟
• هل استلمت ملفات المصدر مع الدليل؟

لو نص هذي ناقصة، الدليل اللي عندك غالبًا عرض تقديمي للهوية، مو دليل استخدام.

الدليل بدون ملفات ما ينفع

أكثر شكوى نسمعها من عملاء يجون لنا بعد تجربة سابقة: "عندي دليل حلو، بس ما عندي الشعار بصيغة تنفع للمطبعة". الدليل يشرح، والملفات هي اللي تشتغل فيها. تأكد إنك استلمت الشعار بصيغ متجهة وملفات الألوان والعناصر، وإن الملكية لك.

متى تحدّث الدليل؟

الدليل مو وثيقة تنكتب مرة وتنقفل. لما تضيف منتج جديد، أو تفتح فرع، أو تطلق تطبيق، أو تكتشف إن الفريق يغلط في نفس الشي مرة بعد مرة، هذا وقت تضيف أو توضح قسم.

صفحات تهمك

• تصميم دليل الهوية البصرية
• تصميم هوية بصرية في السعودية
• خطوط عربية مخصصة للهوية
• نظام ألوان العلامة التجارية
• الفرق بين الشعار والهوية البصرية
• تصميم المطبوعات

دليل يمكن للفريق الرجوع إليه أثناء الشغل

دليل الهوية يحتاج إلى أمثلة تساعد على الاستخدام، وليس مجرد قائمة أكواد. الصور هنا من أدلة مشاريعنا: نظام الألوان، استخدام الشخصية والعناصر التي يبني منها الفريق التصميمات.

شاهد دراسات حالة من مجالات أخرى