الهوية البصرية للشركات في ظل رؤية 2030

وش علاقة رؤية 2030 بالهوية البصرية لشركتك؟

رؤية 2030 مو مشروع تصميم، بس أثرها واضح على السوق اللي تصمم له. القطاعات اللي كانت محدودة صارت مفتوحة، والترفيه والسياحة والفعاليات صارت جزء من الحياة اليومية، ومشاريع ناشئة تطلع كل يوم في كل مجال. النتيجة؟ عميل شاف كثير، ويقارن علامتك بأفضل اللي شافه، سواء محلي أو عالمي.

هذا ما يعني إنك لازم تشبه العلامات العالمية. بالعكس. اللي نشوفه إن العميل السعودي صار يقدّر العلامة اللي تعتز بأصلها وتكون بنفس الوقت متقنة ومرتبة.

المنافسة صارت أعلى

قبل كم سنة، ممكن كان يكفيك شعار مقبول ولوحة زينة عشان تتميز في حيّك. الحين نفس العميل يفتح التطبيق ويشوف عشرين خيار في نفس الفئة. لو هويتك ما تفرقك في أول ثانية، بيتجاوزك.

هذا يرجعنا لأساس الموضوع: الهوية لازم تنبني على تموضع واضح. مو بس شكل حلو، شكل يقول ليش أنت مو غيرك.

الاعتزاز بالهوية المحلية

من أوضح التحولات اللي نلاحظها في طلبات العملاء: رغبة إن العلامة تحس سعودية. مو بمعنى إنك تحط نخلة أو سدو على كل شي، بمعنى إن العلامة تتكلم بلغة الناس، وتستلهم من المكان بذكاء، وما تحس إنها مستوردة.

كيف يطلع هذا في التصميم؟

• خط عربي مرسوم خصيصًا أو مختار بعناية، مو أول خط في القائمة.
• ألوان وأنماط تستلهم من البيئة والعمارة المحلية بدون كليشيهات.
• نبرة كلام قريبة من الناس، بلهجة خفيفة حيث تناسب.
• صور وأسلوب تصوير يشبه الواقع السعودي اليوم.

والفخ هنا هو المبالغة. لما كل علامة تستخدم نفس الرموز التراثية، تضيع كلها في بعض. الأصالة الحقيقية تجي من فكرة خاصة بمشروعك، مو من رمز عام.

العربي أولًا، والإنجليزي متقن

كثير من الشركات السعودية تخاطب جمهورين: سعودي يقرأ بالعربي، ومقيم أو زائر يقرأ بالإنجليزي. وكثير منها لسنين كانت تصمم بالإنجليزي وتترجم. هذا الترتيب صار يبان ضعفه.

رأينا: صمم الاثنين مع بعض من أول يوم. الشعار العربي ما يكون نسخة ثانوية، والإنجليزي ما يكون ترجمة حرفية. لازم يكونون أخوين، نفس الوزن ونفس الروح.

السياحة والترفيه والضيافة

مع نمو قطاعات السياحة والترفيه والضيافة، صار في علامات تخاطب زوار من داخل المملكة وخارجها في نفس الوقت. هنا الهوية تحتاج توازن صعب: تكون سعودية بوضوح، ومفهومة لزائر ما يعرف العربي. اللوحات والإرشادات والتطبيقات والمطبوعات كلها لازم تشتغل باللغتين بدون ما تحس إن وحدة منهم مزحومة.

الرقمي صار الواجهة الأولى

العميل السعودي متعود على تجارب رقمية سلسة، من التطبيقات الحكومية لين تطبيقات التوصيل والبنوك. لما يدخل متجرك أو تطبيقك، يتوقع نفس المستوى. يعني الهوية لازم تنصمم وهي واضعة الشاشة في البال: أيقونة تطبيق، ألوان تشتغل في الوضع الداكن، خطوط واضحة بحجم صغير.

وش تسوي الحين؟

لو هويتك عمرها سنين وتحس إنها ما تمثلك، أو مصممة بالإنجليزي وعربيها مركب، أو ما تشتغل زين على الشاشة، هذا وقت مناسب تراجعها. ومو لازم تبدأ من الصفر. أحيانًا تحديث مدروس للخط العربي والألوان ودليل الاستخدام يكفي.

ولو تبدأ مشروع جديد، ابنِ من الأساس صح: تموضع واضح، هوية عربية أولًا، وتطبيقات رقمية من البداية.

صفحات تهمك

• تصميم هوية بصرية في السعودية
• شعار بالخط العربي
• متى تحتاج تغيّر هوية شركتك؟
• هوية الفنادق والسياحة
• خطوط عربية مخصصة للهوية
• تصميم واجهات التطبيقات

من شكل العلامة إلى استخدامها اليومي

الهوية تظهر قيمتها عندما تعمل على أكثر من مقاس وخامة. الأمثلة التالية توضح كيف نربط بين العلامة وتطبيقاتها، من حقيبة التوصيل إلى شخصية المنتج والمطبوعات.

شاهد دراسات حالة من مجالات أخرى